Ferill 511. máls. Aðrar útgáfur af skjalinu: PDF - Word Perfect.
154. löggjafarþing 2023–2024.
Prentað upp.
Þingskjal 1606 — 511. mál.
Flutningsmaður.
Síðari umræða.
Breytingartillaga
við tillögu til þingsályktunar um aðgerðaáætlun í málefnum íslenskrar tungu 2023–2026.
Frá meiri hluta allsherjar- og menntamálanefndar (BHar, LínS, BGuðm, HHH, JSkúl, DagH).
1. 1. mgr. orðist svo:
Alþingi ályktar að samþykkja eftirfarandi aðgerðaáætlun í málefnum íslenskrar tungu fyrir árin 2024–2026.
2. Við aðgerðaáætlunina bætist ný aðgerð sem verði 1. aðgerð, svohljóðandi:
1. Þekkingaröflun og ráðgjöf.
Áhersla verði lögð á öflun þekkingar á máltöku ólíkra aldurshópa og um kennslufræði íslensku sem annars máls og kennslu nemenda sem búa við fjölbreytt tungumálaumhverfi í daglegu lífi. Niðurstöðum rannsókna verði miðlað til kennara á starfsþróunarnámskeiðum og með ráðgjöf til kennara á öllum skólastigum.
Tímaáætlun: 2024–2026.
Ábyrgð: Háskóla-, iðnaðar- og nýsköpunarráðuneyti.
Dæmi um samstarfsaðila: Mennta- og barnamálaráðuneyti, Háskólinn á Akureyri, Háskóli Íslands, Miðstöð menntunar og skólaþjónustu.
3. Í stað ártalanna „2023–2026“ í 2., 7. og 10. aðgerð komi: 2024–2026.
4. Í stað orðsins „Menntamálastofnun“ í 3., 10., 11., 12. og 13. aðgerð komi: Miðstöð menntunar og skólaþjónustu.
5. Við 5. aðgerð.
a. Við 1. málsl. bætist: á háskólastigi.
b. 3. málsl. orðist svo: Nemendum standi til boða staðlotur í öllum landshlutum.
c. Í stað ártalsins „2025“ í tímaáætlun komi: 2026.
d. Við samstarfsaðila bætist: fræðsluaðilar.
6. 1. mgr. 8. aðgerðar orðist svo:
Allir sem sinna hvers kyns miðlun séu meðvitaðir um þátt sinn í að efla íslenska tungu. Mikilvægi íslenskunnar verði ávallt haldið á lofti í samhengi listsköpunar og miðlunar menningar, ekki síst fyrir börn og ungmenni. Leitast verði við að skapa skilyrði fyrir fólk á öllum aldri og hvar sem það stendur í máltileinkun til að skapa og miðla list sinni á fjölbreyttri íslensku og njóta lista og menningar.
7. 2. málsl. 9. aðgerðar falli brott.
8. Í stað orðsins „grunnfæri“ í 1. málsl. 17. aðgerðar komi: grunnfærni.
9. Við aðgerðaáætlunina bætist tvær nýjar aðgerðir, svohljóðandi:
a. 21. Fræðsla um máltöku og málþroska barna.
Átak verði gert í fræðslu til foreldra og fagfólks í skólastarfi um mikilvægi þess tungumáls sem börn læra fyrst fyrir málþroska og máltöku barna og ungmenna.
Tímaáætlun: 2025–2026.
Ábyrgð: Mennta- og barnamálaráðuneyti.
Dæmi um samstarfsaðila: Miðstöð menntunar og skólaþjónustu, heilsugæslan, Kennarasamband Íslands, Heimili og skóli – landssamtök foreldra og Samband íslenskra sveitarfélaga.
b. 22. Fræðsla og ráðgjöf handa innflytjendum þegar börn þeirra hefja skólagöngu í íslenskum skólum.
Útfærðar verði leiðir til að tryggja foreldrum úr hópi innflytjenda fræðslu og ráðgjöf þegar börn þeirra hefja nám í íslenskum skólum. Markmiðið er að finna leiðir til að miðla upplýsingum um skólastarfið og tryggja foreldrum kennslu í íslenskum orðaforða sem tengist skólagöngu barnanna.
Tímaáætlun: 2024–2026.
Ábyrgð: Mennta- og barnamálaráðuneyti.
Dæmi um samstarfsaðila: Miðstöð menntunar- og skólaþjónustu, Móðurmál – samtök um tvítyngi, fræðsluaðilar, Samband íslenskra sveitarfélaga og Heimili og skóli – landssamtök foreldra.
10. Fyrirsögn tillögunnar verði: Tillaga til þingsályktunar um aðgerðaáætlun í málefnum íslenskrar tungu fyrir árin 2024–2026.